शेअर बाजारातील गुंतवणूकदार आणि ट्रेडर्सचे किमान नुकसान व्हावे यासाठी सेबी सातत्याने प्रयत्नशील असते. या संदर्भात सिक्युरिटीज अँड एक्स्चेंज बोर्ड ऑफ इंडियाच्या (सेबी) अध्यक्षा माधबी पुरी बुच यांनी बॉम्बे स्टॉक एक्स्चेंज (BSE) मध्ये इन्व्हेस्टर रिस्क रिडक्शन ऍक्सेस (IRRA) प्लॅटफॉर्म लाँच केला आहे जो गुंतवणूकदार आणि ट्रेडर्सला तांत्रिक अडचणींमुळे होणाऱ्या नुकसानीपासून संरक्षण देईल. जोखीम कमी करणे हा आर्थिक बाजारातील एक नेहमीचाच विषय असतो आणि विविध प्रकारच्या जोखमींचे निराकरण करण्यासाठी नियामकांकडून सतत प्रयत्न केले जातात. अनेक वेळा अशी प्रकरणे समोर येतात जेव्हा गुंतवणूकदार आणि व्यापाऱ्यांचे तांत्रिक बिघाडांमुळे मोठे नुकसान होते.
गुंतवणूकदारांना तोट्यापासून वाचवणार!
IRRA प्लॅटफॉर्म हा सेबीच्या मार्गदर्शनाखाली मार्केट इन्फ्रास्ट्रक्चर इन्स्टिट्यूशन्स (MIIs) द्वारे डिझाइन केलेला एक उपक्रम आहे जो ट्रेडिंग मेंबरच्या प्राथमिक साइटवर आणि डिजास्टर रिकवरी साइटवर तांत्रिक अडचणीच्या परिस्थितीत गुंतवणूकदारांना भेडसावणारा जोखीम कमी करण्यासाठी अंमलात आणला गेला आहे. MII ने ३ ऑक्टोबर २०२३ पासून IRRA प्लॅटफॉर्म प्रायोगिक तत्वावर सुरू करण्यात आला आणि सोमवारी (२१ नोव्हेंबर) अधिकृतरित्या मोठ्या प्रमाणावर लॉंच करण्यात आला.
अल्गो आणि संस्थात्मक गुंतवणूकदारांसाठी नाही
हा प्लॅटफॉर्म वायरलेस टेक्नॉलॉजीच्या माध्यमातून इंटरनेट आधारीत ट्रेडिंग करणाऱ्या ट्रेडर्ससाठी उपलब्ध असेल. परंतू हा प्लॅटफॉर्म अल्गो ट्रेडिंग आणि संस्थात्मक ग्राहकांसाठी उपलब्ध नसेल. दरम्यान, सेबीच्या अध्यक्षा माधबी पुरी बुच म्हणाल्या की, या सेगमेंटमध्ये ९०% व्यक्तींनी पैसे गमावले असूनही फ्युचर्स अँड ऑप्शन्स (F&O) मधील गुंतवणूकदारांच्या स्वारस्याबद्दल त्या “संभ्रमित आणि आश्चर्यचकित” झाल्या आहेत. बीएसई येथे इन्व्हेस्टर रिस्क रिडक्शन ऍक्सेस (IRRA) प्लॅटफॉर्म लॉन्च करताना, बुच म्हणाल्या की गुंतवणूकदारांच्या निधीचे रक्षण आणि गुंतवणूकदारांच्या स्थितीचे संरक्षण करणे सुनिश्चित करण्याचा या प्लॅटफॉर्म मागील उद्देश आहे.